Act 18 | BOJ | STEP | Ariya bati bei Pol a Atens qure uratosiqa walwelosiq Korin qureq gilej.

Acts 18

Pol a Korin qureq dia Yesus aqa anjam plaltosiq minjroqnej

1 Ariya bati bei Pol a Atens qure uratosiqa walwelosiq Korin qureq gilej. 2 Gilsiq dia Juda tamo bei aqa ñam Akwila itej. Akwila aqa qure utru Pontus. Nami yala naŋgi aqa ŋauqali Prisila wo Itali sawa uratosib Korin beb. Rom naŋgo mandor koba Sisar Klodius a marej, “Juda naŋgi Rom qureq endia sqasai. Kalil jaraiiye.” Deqa naŋgi aiyel Itali sawa uratosib Korin qureq beb. Bosib Korin qureq di sonabqa Pol a gilsiq naŋgi itnjrej. 3 Pol a naŋgi ti wau qujai. Deqa naŋgi koba na Korin qureq di sosibqa silali qa wauoqneb. Naŋgo silali wau agi naŋgi gara na tal gereiyoqneb. 4 Yori bati gaigai Pol a Juda naŋgo Qotei tal miligiq giloqnsiqa Juda ti Grik ti naŋgi Yesus aqa anjam plaltosiq minjroqnej. Aqa anjam dena naŋgo are qametnjrimqa naŋgi Yesus qa naŋgo areqalo siŋgilatqajqa deqa anjam minjroqnej.

5 Onaqa bati bei Sailas wo Timoti wo naŋgi Masedonia sawa uratosib bosib Korin qureq dia Pol itosib naŋgi koba na soqneb. Deqa Pol a na aqa silali wau di uratosiqa Qotei aqa anjam segi wauoqnej. Osiqa Juda naŋgo Qotei tal miligiq giloqnsiqa naŋgi siŋgila na endegsi minjroqnej, “Yesus a bole Kristus Qotei na qariŋyej qaji.” 6 Degsi minjreqnaqa Juda naŋgi Pol aqa anjam di qusib gotraŋyoqnsib Pol misiliŋyoqneb. Deqa Pol a na aqa segi gara jugo tumbrum butuyosiqa minjrej, “Niŋgi padalqab di nuŋgo segi une na niŋgi padalqab. Ijo une na sai. Deqa bini e niŋgi uratŋgsiy sawa bei bei qaji tamo naŋgoq giloqnsiyqa Yesus aqa anjam naŋgi segi minjroqnqai.” 7 Pol a na Juda naŋgi degsi minjrsiqa naŋgo Qotei talq dena oqedosiq gilsiq tamo bei aqa ñam Titius Jastus aqa talq di soqnej. Titius a dego Qotei qa louoqnej qaji tamo. Aqa tal di Juda naŋgo Qotei tal jojomq di soqnej. 8 Bati deqa Qotei tal taqato tamo aqa ñam Krispus a ti tamo uŋgasari kalil a ombla tal qujaiq di soqneb qaji naŋgi ti Pol aqa anjam qusib are bulyosib Tamo Koba Yesus qa naŋgo areqalo siŋgilateb. Korin tamo uŋgasari tulaŋ gargekoba naŋgi dego Pol aqa anjam qusib Yesus qa naŋgo areqalo siŋgilatosib yanso eb.

9 Bati bei qolo Qotei na Pol aqa areqalo waqtetonaqa a ŋeiobilqeiobulosiqa Tamo Koba Yesus unej. Unnaqa minjej, “O Pol, ni ulaaim. Ni qure endia sosimqa ino medabu waqtoqnsimqa boleq na ijo anjam mare mare laqne. Mequmaim. 10 Ni ijo anjam mare mare laqnimqa tamo bei na ni ugeugeimqasai. Di kiyaqa? E ni ombla sqai deqa. Qure endia ijo segi tamo uŋgasari gargekoba unub. Deqa ni boleq na ijo anjam mare mare laqne. Ni ulaaim.” 11 Yesus a na Pol anjam degsi minjnaqa a anjam di dauryosiqa Korin qureq dia wausau qujai bai 6-pela sosiqa tamo uŋgasari naŋgi Qotei aqa anjam plaltoqnsiq minjroqnej.

12 Ariya Pol a Korin qureq di sonaqa Rom naŋgo gate koba bei aqa ñam Galio a Akaia sawa taqatoqnej. Bati deqa Juda naŋgi Pol qa minjiŋ oqetnjrnaqa a ojsib koro sawaq osi gilsib Galio aqa awo jaram namoq di tigelteb. 13 Tigeltosib Galio minjeb, “Tamo endena iga Juda tamo uŋgasari gago dal anjam gotraŋyoqnsiqa iga Qotei louqajqa gam bei osorgeqnu.” 14 Onaqa Pol a kamba anjam marqa laqnaqa Galio na getentosiqa Juda naŋgi minjrej, “O Juda tamo uŋgasari, niŋgi quiye. Tamo endi a une kobaquja bei yimqa kio tamo bei qalim moiimqa kio niŋgi a ojsib bosib ijo ulatamuq endia tigeltqab di e nuŋgo anjam quqwai. 15 Ariya niŋgi bosib nuŋgo segi dal anjam qa ti nuŋgo segi moma naŋgo ñam qa ti maronub deqa e na nuŋgo anjam di gereiyqasai. Di ijo wau sai. Niŋgi segi na gereiyiye.” 16 Galio a na Juda naŋgi degsi minjrsiqa aqa awo jaramq dena naŋgi winjrej. Deqa Juda naŋgi are ugeinjrnaqa naŋgo Qotei tal taqato tamo aqa ñam Sostenes a ojsib Galio aqa awo jaram namoq dia qalougeteb. Onaqa Galio a di unsiqa a deqa are qalosai. Unsiq unosaibulej.

Pol a Antiok qureq olo gilsiqa di soqnej

18 Pol a bati gargekoba yala Korin qureq di sosiqa Yesus aqa tamo uŋgasari naŋgi koba na wauoqneb. Osiqa dena tigelosiqa naŋgi uratnjrsiqa Senkria qureq gilej. Gilsiq di sosiqa Juda naŋgo kumbra dauryosiqa aqa segi gate baŋga ti mejuŋgum ti gentej. Nami a Qotei pailyoqnsiq deqa aqa gate baŋga ti mejuŋgum ti gentosaioqnej. Deqa a tulaŋ olekobaoqnej. Ariya pailyo di koboonaqa a Senkria qureq dia aqa gate baŋga ti mejuŋgum ti gentej. Osiqa Senkria qure uratqa osiqa Prisila wo Akwila wo naŋgi joqsiqa koba na qobuŋ gogetosib gileb. Gilsib Siria sawaq di brantosib Efesus qureq di tiryeb. 19 Tiryosib mandamq aisib Pol a Juda naŋgo Qotei tal miligiq gilsiqa naŋgi Qotei aqa anjam plaltosiq minjroqnej. Onaqa naŋgi Pol aqa anjam qusib minjeb, “Ni bati qudei iga koba na endi sqom.” Minjnabqa a na naŋgi saidnjrsiqa gilqa osiqa minjrej, “Qotei na odbimqa bunuqna e nuŋgoq olo bqai.” Degsi minjrsiqa a qobuŋ gogetosiq gilej. A Prisila wo Akwila wo naŋgi Efesus qureq di uratnjrnaq soqneb. 22 Pol a gilsiqa Sisaria qureq di tiryosiqa qobuŋ uratosiqa siŋga na walwelosi aisiq Jerusalem qureq di brantej. Brantosiqa Yesus aqa tamo uŋgasari naŋgi itnjrsiqa koba na soqneb. Osiqa naŋgi olo uratnjrsiqa walwelosiq Antiok qureq gilej.

23 Gilsiq Antiok dia bati gargekoba yala sosiqa dena walwelosiq Galesia sawa ti Frigia sawa ti dia laqnej. Laqnsiqa naŋgo qure kalilq dia brantoqnsiqa tamo uŋgasari Yesus qa naŋgo areqalo siŋgilateb qaji naŋgi koroinjroqnsiqa Qotei aqa anjam na are siŋgilatetnjroqnej.

Apolos a Efesus qureq dia Qotei aqa anjam plaltoqnej

24 Onaqa bati bei Juda tamo bei aqa ñam Apolos aqa qure utru Aleksandria a bosiqa Efesus qureq di wauoqnej. A Qotei aqa anjam maro qaji tamo. A Qotei aqa anjam tulaŋ qaliedamu. Deqa a na Qotei aqa anjam kalil nami neŋgreŋyeb qaji di geregere plaltoqnej. 25 Tamo qudei naŋgi na nami Tamo Koba Yesus aqa gam Apolos osoryeb. Deqa a siŋgila na Yesus aqa anjam plaltoqnsiqa tamo uŋgasari naŋgi minjroqnej. Ariya Yesus aqa ñam na tamo yansnjrqajqa kumbra di Apolos a qaliesai. Jon yansnjro qaji a na nami tamo uŋgasari naŋgi yansnjroqnej kumbra di segi Apolos a qalieej. 26 Deqa bati bei a Juda naŋgo Qotei tal miligiq dia siŋgila na anjam minjreqnaqa Prisila wo Akwila wo naŋgi aqa anjam qusibqa a osib Qotei aqa gam bole geregere osoryonab a poiyej. 27 Onaqa bunuqna Apolos a marej, “E Akaia sawaq gilqai.” A degsi marnaqa Yesus aqa tamo uŋgasari Efesus qureq di soqneb qaji naŋgi na odosib minjeb, “Di kere. Ni gilime.” Degsib minjsibqa anjam bei neŋgreŋyosib Apolos yonab a na osi gilsiqa Yesus aqa tamo uŋgasari Akaia sawaq di soqneb qaji naŋgi enjrej. Endegsib neŋgreŋyeb, “O gago was niŋgi quiye. Apolos a nuŋgoq bqo. Deqa niŋgi a osib geregereiyiye.” Ariya Apolos a Akaia sawaq dia Yesus aqa tamo uŋgasari naŋgi itnjrnaqa naŋgi na a osib geregereiyeb. Onaqa a na naŋgi Qotei aqa anjam minjreqnaqa aqa anjam dena naŋgo are siŋgilatetnjroqnej. Qotei a nami naŋgi qa are tulaŋ boleiyosiqa naŋgo areqalo waqtetnjrnaqa naŋgi are bulyosib Yesus qa naŋgo areqalo siŋgilateb. Apolos a bosiqa tamo uŋgasari naŋgi di are siŋgilatetnjroqnej. 28 Osiqa Juda tamo naŋgi koba na anjam na qotoqnsib Qotei aqa anjam nami neŋgreŋyeb qaji di plaltoqnsiqa Yesus a bole Kristus Qotei na qariŋyej qaji anjam di siŋgila na minjroqnej. A boleq na anjam minjroqnej.